Nasawi si John Patrick Nacis, 23 anyos, ng Phase 2 Barangay Pinagsama, makaraang tumama ang ulo nito sa kalsada nang mahulog sa isang jeepney na biyaheng FTI Taguig.
Sinabi sa Taguig.com ng ina ni Nacis na si Ofel Mansalapus-Nacis, 45 anyos, na ang kuwento ng driver ng jeep, nasa hulihang bahagi ng kanyang minamanehong sasakyan ang biktima nang bigla itong tumalon dahil diumano sa nahulog nitong cellphone.
Gayunman, may nakarating na balita kay Mansalapus-Nacis na nahulog lamang sa tapakan sa entrada ng pasahero ang cellphone at nang dadamputin ito ni Nacis ay bigla diumanong umandar ng mabilis ang jeep na naging dahilan ng pagkahulog nito.
Ang driver ng jeep ay pinayagan ding makauwi ng pulisya makaraang magbigay ito ng pahayag.
"Nasa tapat po sila ng Wildcat Palar near butas, doon po siya nahulog. Malayo pa po sa bababaan niya sa overpass ng Pinagsama," ayon kay Mansalapus-Nacis.
Nakikiusap ang ina ni Nacis sa mga kasakay ng kanyang anak na makipag-ugnayan sa kanila upang lumabas ang katotohanan sa pagkahulog at pagkamatay ng kanyang anak.
"Kami po ay nananawagan sa kung sino man po ang nakakita o nakasakay sa dyip noong May 6, 2024 around 7:30pm. Gusto lang po namin malaman kung ano ba talaga ang totoong nangyari sa gabing iyon para magkaroon ng malinaw na sagot sa mga katanungan namin. Paki-contact na lamang po ang number na ito 09673242455. Magbibigay na lamang po kami nang kaunting tulong sainyo sa kung sino man po ang nakakaalam," ayon kay Mansalapus-Nacis.
Ang biktimang si Nacis ay kakatapos lamang ng kursong BSBA Major in Marketing sa Taguig City University at 3 buwan pa lamang na nagta-trabaho bilang Account Executive sa isang opisina sa Ortigas, Pasig.
Panganay si Nacis sa apat na anak ni Mansalapus-Nacis.
"Sana po ay matulungan nyo kaming mahanap ang katotohanan at sana ay may lumabas na witness," ayon kay Mansalapus-Nacis.
Inilibing na ang biktima sa Santa Ana Cemetery kamakailan.
(Larawan mula kay Ofel Mansalapus)
