(Larawan mula sa Provincial Government ng Northern Samar)
Ang pagkakasabat sa tatlo ay naganap isang araw makalipas na makadiskubre sa naturang pier ang inabandonang hinihinalang shabu na nagkakahalaga ng P61 milyon. Naniniwala ang mga pulis na may kinalaman ang tatlo sa inabandonang maletang may lamang shabu.
Naharang ng mga tauhan ng Allen Municipal Station ang isang L-300 van na minamaneho ng lalaking taga-Taguig kung saan kasama nito ang dalawang iba pang pasahero mula sa Cotabato City at Maguindanao. Sa pag-iinspeksyon ng mga pulis, katulong ang Police Service-Explosive Detection Dog (EDD), nakita ang mga matataas na kalibre ng baril at mga pampasabog sa loob ng sasakyan.
Kabilang sa nadiskubre ang naka-assemble nang M16 rifles, cartridge 40mm AVACOR, parte ng riple, military uniforms, iba't ibang bala, IDs, ATM cards, at cash.
Kakasuhan ng illegal possession of firearms and explosives ang tatlong suspek, ayon kay Police Colonel Sonnie Omengan, Northern Samar police chief.
Isang araw bago naharang ang L-300 van na may mga baril at pampasabog, nadiskubre ang P61 milyong halaga ng shabu sa isang iniwang maleta sa FastCat Ferry Terminal sa Barangay Kinabranan Zone II, Allen, Northern Samar noong Agosto 8, 2024.
Isang 30 taong gulang na port officer ang nakakita sa inabandonang maleta at iniulat sa Philippine Coast Guard.
Nakuha ng Coast Guard K9 Field Operating Unit ang siyam na bloke ng bag ng tsaa na may lamang shabu, at tinatayang may timbang na 9.695 kilograms.
Ang nakuhang droga ay dinala sa Allen Municipal Police Station para sa dokumentasyon bago ibinigay sa Northern Samar Police Forensic Unit para sa eksaminasyon. Inaalam pa ang pinanggalingan ng naturang droga.
