Mga Replica at Estandarte ng Itim na Nazareno, Babasbasan sa Quiapo Ngayong Huwebes ng Hapon | Taguig Balita

Babasbasan ang mga replica ng Mahal na Itim na Nazareno at ang mga estandarte o banner ngayong Huwebes ng hapon sa footbridge na malapit sa Minor Basilica ng Black Nazareno sa may Quezon Boulevard, Manila.


(Larawan mula sa Quiapo Church)

Sa ganap na ala 1:30 ng hapon, Enero 2, 2025, ay babasbasan ang mga replica ng Black Nazarene sa naturang lugar sa Quiapo, ayon kay Silgen Cabrito ng Social Communications Department ng Quiapo Church.

Magsasagawa rin ng Novena Mass sa minor basilica ng alas 12:15 ng tanghali. Ang Papal Nuncio to the Philippines na si Arcbishop Charles Brown ang mangunguna sa Misa.

Ang pagbabasbas sa mga replica at estandarte ay bahagi ng selebrasyon ng Kapistahan ng Itim na Nazareno sa Enero 9, 2025.

Ang mga replica ay ipu-prusisyon din ilang araw bago ang pinakamalaking prusisyon ng Itim na Nazareno o ang Traslacion na magdadala sa imahe mula Quirino Grandstand sa Luneta patungong Simbahan ng Quiapo.