Nagpalabas ng kautusan si Dr. Cynthia Ayles, OIC ng Office of the Schools Division Superintendent, sa Best Security, Incorporated at Best Arms Security Agency, Incorporated upang magtalaga na ito ng mga kinakailangang bilang ng nga security guards na magbabantay sa mga karagdagang pampublikong eskwelahan simula Agosto 12, 2023 ng alas dose ng tanghali.
Pumalag naman ang pamahalaang lungsod ng Makati sa pamamagitan ni Arnold Magpantay, City General Services Officer, na nagpalabas ng memo na ipinadala kay Jaime Dimaano ng Greatstar Security Services, Incorporated, ang inuupahan ng Makati City para magbantay sa 14 na public schools.
Inutusan ni Magpantay si Dimaano na huwag payagan ang sinuman sa mga tauhan ng Taguig City na pumasok sa 14 na apektadong pampublikong eskwelahan hanggang walang nakasulat na pahintulot mula sa pamahalaang lungsod ng Makati.
Ayon kay Magpantay, walang koordinasyon sa pamahalaang lungsod ng Makati ang binabalak na diumano ay takeover ng bagong security agencies mula sa Taguig.
"You are instructed to implement strict security measures and safeguard the property by not allowing personnel from Taguig City to enter the school premises without written consent from the City Government of Makati," ayon sa kautusan ni Magpantay.
Kabilang sa mga eskwelahang apektado ng paglilipat ng Embo barangays mula Makati tungong Taguig ay ang Fort Bonifacio Elementary School, Cembo Elementary School, South Cembo Elementary School, Pitogo Elementary School, East Rembo Elementary School, Rizal Elementary School, Comembo Elementary School, West Rembo Elementary School, Pembo Elementary School, Makati Science High School, Benigno S. Aquino High School, Tibagan High School, Fort Bonifacio High School at Pitogo High School.
Ito ay kaugnay naman ng desisyon ng Korte Suprema na ibigay sa Taguig ang teritoryong nakakasakop sa sampung barangay na dati ay sa Makati: Cembo, Comembo, Pembo, East Rembo, West Rembo, South Cembo, Pitogo, Post Proper Northside, Post Proper Southside at Rizal.
(Photos from Lalaine Guanzon)
